Qərbi Kaspi Universitetində Ümummilli lider Heydər Əliyevin anadan olmasının 96-cı ildönümünə həsr olunmuş “Dağlar: Mədəniyyətlər, Landşaftlar və Biomüxtəliflik” adlı Beynəlxalq konfrans keçirilib.

Konfransın plenar iclasında çıxış edən universitetin Qəyyumlar Şurasının sədri, professor Hüseynqulu Bağırov ulu öndərin Azərbaycan tarixindəki əvəzsiz rolunu, dövlətimizin qurulması və möhkəmlənməsindəki xidmətlərini, eləcə də ölkəmizin ekoloji vəziyyətinin yaxşılaşdırılması istiqamətində fəaliyyətini qeyd edib. H.Bağırov konfransın həsr olunduğu sahənin problemlərinin dünyanın nüfuzlu tədqiqatçılarının iştirakı ilə müzakirəsi baxımından əhəmiyyətini vurğulayıb.

Universitetin rektoru, professor Andris Leitas qeyd edib ki, dünyadakı bütün dağlıq ərazilərə sərhədsiz qaynaqların istismarı və hazırda da inkişaf edən turizm sektoru təsir edir. Bu inkişaf bioloji müxtəlifliyə və dağların populyasiyalarına təzyiq göstərir. Konfransın məqsədi bu problemləri həll etmək üçün yeni və yaradıcı həll yollarını tapmaq məqsədilə alimlər, ekoloqlar, bioloqlar, turizm mütəxəssisləri və digər bu problemin həlli ilə maraqlanan mütəxəssislərin müzakirələrini təşkil etməkdir.

BMT-nin ölkəmizdəki Rezident Əlaqələndiricisi Qulam İsakzai, AMEA-nın Coğrafiya İnstitunun direktoru professor Ramiz Məmmədov, Böyük Britaniyanın Kral Coğrafiya Cəmiyyətinin üzvü, Beynəlxalq Dağçılıq və Alpinizm Federassiyasının Dağların mühafizəsi Komissiyasının vitse-prezidenti Maykl Maunsel, Beynəlxalq Dağçılıq və Alpinizm Federassiyasının Dağların mühafizəsi Komissiyasının üzvü, Birinci Albert Dağçılıq İdarə Heyətinin üzvü Lode Bekers , BMT Qida və Kənd təsərrüfatı təşkilatı nəzdində Dağ tərəfdaşlığı katibliyinin proqram rəhbəri Rozalauro Romeo, “Zukov” ətraf mühitin müdafiəsi Fondunun təsisçisi Mixael Zukovun çıxışlarında dağ landşaftlarının xüsusiyyətləri, məskunlaşmanın vəziyyəti, dünyanın müxtəlif ölkələrində bu sahədəki problemlər, perspektivlər, dağlıq ərazilərdə infrastruktura, təhsil və müxtəlif xidmətlərə çıxış imkanlarının təmin olunmasının vacibliyi məsələləri, dağların mühafizəsi sahəsində həyata keçirilən layihələr və s. müzakirə olunub.

Daha sonra suallar cavablandırılıb, mövzu ilə bağlı fikir mübadiləsi aparılıb.

Konfrans işini sessiyalarda davam etdirib.

Qeyd edək ki, konfransda dünyanın 40-dək ölkəsindən xarici tədqiqatçılar, eləcə də yerli mütəxəssislər iştirak ediblər. Konfrans “Dağ ekosistemləri, ekoloji və bioloji müxtəliflik”, “Dağ landaşftları”, “Dağ Mədəniyyətləri”, “Dağ turizmi və Rekreasiya” sessiyaları üzrə keçirilib.

İştirakçılar konfransın yeni elmi tədqiqatlara yol açacağını, aid olduğu sahənin problemlərinin müzakirəsi və atılmalı olan addımların müəyyənləşdirilməsi baxımından mühüm əhəmiyyət kəsb etdiyini vurğulayıblar.

“Bu konfransda iştirakdan çox məmunam. Bu tədbir çox böyük əhəmiyyətə malikdir. Tədbir çərçivəsində dünyadakı tədqiqatçılar, alimlər, tələbələr, dağçılıq həvəskarları bir araya gəlib. Təqdqiqatçılar dağlarla bağlı hazırkı vəziyyəti, problemləri müzakirə etdi, həlli yolları üzərində düşündü. Konfrans nəinki Azərbaycan, BMT üçün də olduqca vacib idi”.

Bu sözləri BMT-nin Azərbaycandakı rezident əlaqələndiricisi Qulam İsaqzai Qərbi Kaspi Universitetində keçirilən Ümummilli lider Heydər Əliyevin anadan olmasının 96-cı ildönümünə həsr olunmuş “Dağlar: Mədəniyyətlər, Landşaftlar və Biomüxtəliflik” adlı Beynəlxalq konfransdan sonra əməkdaşımıza açıqlamasında bildirib.

Q.İsaqzai deyib ki, bu tədbirin əsas əhəmiyyəti ondan ibarətdir ki, meşələr, dənizlər, çaylara nisbətdə dağlar haqqında az danışılır və biz diqqəti dağlara da yönəlməsinə çalışırıq. Çox sevindirici haldır ki, Azərbaycan bu mövzuya yer ayırır.

İndoneziya Respublikasının ölkəmizdəki fövqəladə və səlahiyyətli səfiri Husnan Bey Fanani isə “Yeni Musavat”ın əməkdaşı ilə söhbətində bildirib ki, görkəmli alimlərin iştirakı ilə keçirilən konfrans bu sahədəki problemlərin həllində əhəmiyyətli rol oynaya bilər: “Azərbaycan çox gözəl təbiətə malik ölkədir. Elmin təbiətə bu cür diqqət ayırması isə alqışalayiqdir”.

Böyük Britaniyanın Kral Coğrafiya Cəmiyyətinin üzvü, Beynəlxalq Dağçılıq və Alpinizm Federassiyasının Dağların mühafizəsi Komissiyasının vitse-prezidenti Maykl Maunsel əməkdaşımıza açıqlamasında Azərbaycanın dağlarla bağlı problemə diqqət ayırmasını belə şərh edib: “Konfrans ekoloji problemlər, dağçılıq və dağ landşaftlarının tədqiqatı ilə məşğul olan mütəxəssislərin bir araya gətirilməsi, müzakirələrin elmiliyi və praktikliyi baxımından əhəmiyyətlidir. Auditoriyadan verilən suallar da göstərdi ki, Azərbaycanda da bu mövzu elmi dairələri maraqlandırır, problemlər onları da narahat edir. Tələbələrin də bu mövzuya maraq göstərməsi sevindirici haldır.”